ضربة الشمس (heat stroke) 😨
بما انو هل الايام درجه الحرارة كلش عالية (الشمس تسمط سمط)، حبينا نحجي اليوم عن ضربه الشمس بس بالبداية خل نعرف شنو هو:
ضربه الشمس تصير لمن الانسان يتعرض للحرارة العالية و لوقت طويل، هذا التعرض يخربط ال(thermostat) عدنا و الي هو ال(hypothalamus) هاي الخربطة تخلي درجه حرارة الجسم مضوبط ع درجه اعلى من الطبيعي مالته ممكن 40 او 41 درجه سيليزيه.
هي الخربطه تخلي الجسم يتصرف كأنه درجه حرارته الاصلية 40 او 41 لذلك الجسم راح يحاول يوصل لهاي الحرارة المطلوبه عن طريق ايقاف التعرق و الي يتعتبر احد وسائل تبريد الجسم.
زين شنو هو الاعراض مال ضربه الشمس:
1-صخونه يعني درجه حرارة المريض ممكن يكون 40 او 41 مثل مكلنا.
2-جفاف الجلد يعني ماكو اي تعرق لان الجسم اوقف نظام التبريد مالته.
3-الدوخه و الدوار و الرغبة بالقيء (الملح و البهارات مال اغلب الامراض)
4-فقدان الوعي يعني مثل التليفون من يحمه ينطفي (طبعا هاي نحجي في الحالات الشديدة)😣
العلاج: لازم تبرد الجسم بأسرع وقت ممكن يعني تنزع ملابس المريض و تحطه كدام التبريد ( و لا تخاف مراح يستبرد) او تدخله ببانيو بيه مي بارد..... يعني ببساطه مثل الايفون من تبرده يرجع يشتغل
و بالاخير الوقاية خير من العلاج يعني غطي راسك بشي و اشرب مي اهواي علمود لا تصير بيك ضربه شمس او اكلك اصلا لا تطلع برة شعندك بهل الحر.😁
و دمتم سالمين.
محمود احمد
ليست هناك تعليقات:
إرسال تعليق